ШҮҮХИЙН ШИЙДВЭР ГҮЙЦЭТГЭХ ЕРӨНХИЙ ГАЗАР

Шүүхийн шийдвэр гүйцэтгэх ерөнхий газрын харьяа Хэнтий аймаг дахь Шүүхийн шийдвэр гүйцэтгэх газар-419 дүгээр нээлттэй хорих анги түүхт 50 жилийн ойгоо 2023 оны 7 дугаар сарын 05-06-ны өдрүүдэд ёслол төгөлдөр тэмдэглэж байна.

Тус ангийн түүхт 50 жилийн ойн арга хэмжээнд Шүүхийн шийдвэр гүйцэтгэх ерөнхий газрын Тэргүүн дэд дарга бөгөөд Хорих ял эдлүүлэх албаны дарга, хурандаа Б.Нандинболор, Шүүхийн шийдвэр гүйцэтгэх байгууллагын харьяа анги байгууллага, салбар нэгжүүдийн удирдлагууд, ахмад ажилтнууд оролцож байна.

Ойн баярын хүрээнд Хэнтий аймаг дахь төрийн цэргийн болон хууль сахиулах байгууллагуудын ёслолын жагсаал, баярын хурал болж, Шүүхийн шийдвэр гүйцэтгэх ерөнхий газрын Соёмбо чуулгын хамт олон уран бүтээлийнхээ дээжийг өргөн барилаа.

Мөн үеэр эрхэлсэн ажилдаа идэвх зүтгэл, үр бүтээл гарган ажиллаж байгаа зарим алба хаагчдыг Хууль зүй, дотоод хэргийн яам, Шүүхийн шийдвэр гүйцэтгэх байгууллага, Хэнтий аймгийн Засаг даргын шагналаар шагнаж, урамшууллаа.

Тус анги улс орон, аймаг орон нутгийн бүтээн байгуулалтад хувь нэмрээ оруулж ирсэн бөгөөд эдүгээ Монгол Улсын Засгийн газраас дэвшүүлсэн “Шинэ сэргэлтийн бодлого”-ын Боомтын сэргэлтийн хүрээнд экспорт, импортын шинэ гарц болох Зүүнбаян-Ханги чиглэлийн 226,9 километр төмөр замын ажилд оролцож байна.